Delas Fest 2019
Entre o 9 e o 15 de decembro de 2019, a comarca de Santiago converteuse no epicentro da primeira edición do Delas Fest.
Grazas á colaboración da Deputación da Coruña; o Concello de Ames; o Concello de Teo; o Concello de Santiago; e ao patrocinio e colaboración de distintas empresas e entidades (Cuarto Pexigo; Pinturas PROA; Gadis; Fogar Natural; Infinita Viajes, e Dinamo Publicidade), puidemos desenvolver numerosas actividades en distintos espazos da bisbarra coa participación de oito creadoras feministas que, desde diferentes disciplinas, sensibilidades e enfoques traballan desde unha concepción do espazo público como plataforma de expresión artística e intervención política.
Ademais de tres intervencións murais -a cargo de Btoy, Dúo Amazonas e Lorena Cosba-, unha demostración de muralismo e un obradoiro de iniciación á arte urbana de guerrilla, celebramos unha xornada de conversa e debate na procura de visibilizar “Onde están as mulleres na arte urbana?”.
Lara Seixo, curadora de numerosos festivais de arte urbana e directora de MistakerMaker, Vegan Bunnies, recoñecida expoñente do graffiti catalán, e as artistas e graffiteiras galegas Lupita Hard e Iria Fafián, completaron coa súa presenza nas actividades o cartel da edición inaugural.
Obradoiros e encontros
-
Introdución á arte urbana de guerrilla
Impartido pola graffiteira e activista, Vegan Bunnies, o obradoiro de introdución á arte urbana de guerrilla organizouse coa vontade de achegar as posibilidades desta disciplina como ferramenta que democratiza a expresión e intervención no espazo público.
-
Elas tamén Pintan: demostración de muralismo
Unha demostración práctica entre 7H Cooperativa Cultural e varias ex alumnas do programa artístico educativo Elas tamén Pintan, permitiu achegar ás técnicas do muralismo contextual ao ensanche compostelán desde unha perspectiva de xénero.
-
Xornada de conversa e debate “Onde están as mulleres na arte urbana?”
Co obxectivo de combater tamén no plano teórico as desigualdades de xénero existentes no sector, esta xornada de faladoiros contou coa participación de tres das catro artistas encargadas de realizar as intervencións en gran formato, e doutras cinco profesionais do ámbito galego e peninsular.