(con) VALORES
Como en cada casa, somos as persoas e os nosos valores compartidos os que facemos fogar. En 7H Cooperativa Cultural escollemos facer poñendo no centro o que nos sostén: o compromiso, a comunidade e os coidados. Non só somos cooperativa porque así o di a nosa forma legal, senón porque cremos no modelo que representa: a economía social e solidaria como camiño para transformar realidades e relacións laborais.
A nosa aposta é política, cultural e vital: emprender con valores, construír rede desde a base e poñer as necesidades das persoas e da contorna por riba de calquera beneficio económico. Sabemos que a cultura pode ser lugar de encontro e transformación. Por iso, escollemos facer desde aquí, con este compás ético que guía o noso traballo diario.
Non como etiqueta, senón como práctica. Poñemos o coidado no centro, cuestionamos as violencias e desigualdades, e traballamos para crear espazos seguros, diversos e accesibles. Cada proxecto é unha oportunidade para visibilizar outras voces, outras formas de facer e outras maneiras de estar no mundo, por iso nos situamos desde a interseccionalidade.
Cremos no poder do colectivo, na intelixencia compartida e nas decisións tomadas a varias mans. A cultura é para nós un lugar de encontro, non de competencia, e por iso apostamos polo traballo colaborativo e en rede: xuntas chegamos máis lonxe! Somos socias da Unión de Cooperativas Espazocoop; REAS Galicia e AIS O Peto; das asociacións profesionais AGPXC, REACC e AELG, da asociación de emprendemento Pont-Up Store, e das cooperativas Coop57, Somos Conexión e Nosa Enerxía.
Traballamos desde a escoita activa e o diálogo coas realidades que habitamos. Non chegamos para intervir, senón para sumar, acompañar e co-crear proxectos con sentido e arraigo. A nosa acción parte do local, respecta os contextos e contribúe ao benestar común. E sempre en galego!
O camiño é tan importante como o destino. Coidamos os procesos, os tempos, as relacións e ás persoas que os fan posibles. Practicamos o que queremos ver no mundo: relacións simbióticas, vínculos honestos, afectivos e sostibles. Defendemos unha economía centrada nas persoas, onde o ben común prevalece sobre o lucro. Porque sabemos que o salario é un dereito, pero tamén o é traballar cun propósito compartido, desde o respecto, a equidade e a xustiza social.
Aínda que somos un proxecto pequeno e independente, esforzámonos por garantir unhas condicións laborais dignas, tanto do equipo central de cada proxecto, coma de todas as profesionais que colaboran con nós, cumprindo coas boas prácticas sinaladas polas asociacións profesionais e os convenios colectivos correspondentes. No noso día a día, seguimos o Decálogo de boas prácticas na xestión cultural das artes visuais, o Código de Boas Prácticas das S. Coops. Galegas e o Decálogo de Boas Prácticas da Rede Iberoamericana de Arte Urbana. Desde o 2023 estamos tamén adheridas aos compromisos do Pacto Cultura Sustentable e cada ano realizamos a Auditoría Social de REAS, cuxos resultados son compartidos publicamente.
En 2016, este xeito de facer, foi recoñecido co Premio aos Valores Cooperativos da Xunta de Galicia. No 2018, a Deputación da Coruña concedeunos o Premio Begoña Caamaño á Acción Cultural pola Igualdade de Xénero. Sabemos que os premios non o son todo, pero si confirman que, ás veces, o camiño feito con mimo e a pequena escala é merecedor de agarimosos e ilusionantes recoñecementos. E a quen lle amarga un doce?