Taller de Análise de Obra
- Ano
- 2016
- Lugar
- Galicia
- Xestión e mediación cultural
- Publicacións
O TAO (Taller de Análise de Obra) foi un espazo de formación e aprendizaxe colectivo entre pares, construído en colaboración con Desirée Vidal, socia fundadora de Offmuseum, co fin de impulsar e enriquecer o intercambio entre doce artistas seleccionadas nunha convocatoria aberta e nove axentes culturais convidadas polo programa, así como de promover a diversificación e o fortalecemento do circuíto artístico galego.
Inspirado no Taller de Análise e Confrontación de Obra da entidade arxentina El Levante, o obradoiro permitiu ás participantes madurar, examinar e contrastar os seus traballos e procesos mediante a súa exposición e a posterior análise crítica e construtiva por parte do grupo nun ambiente de diálogo e intimidade profesional.
A realización da experiencia foi ademais posible grazas á colaboración do Salón Teatro, a Fundación Granell, o Campus Stellae, a Galería Metro, a Cidade da Cultura, a Universidade de Santiago, o Matadoiro Compostela, o Auditorio de Galicia e o Centro Galego de Arte Contemporáneo.
