Xornada de conversa e debate “Onde están as mulleres na arte urbana?”

Logo dunha presentación introdutoria na que Clara Rodríguez Cordeiro, como comisaria do Delas Fest, achegou información de relevancia para a contextualización, tanto cualitativa coma cuantitativa, do panorama da arte urbana galega desde unha perspectiva de xénero, Lara Seixo Rodrigues, curadora e produtora de eventos de arte urbana portuguesa desde Mistaker Maker, foi a encargada de inaugurar a xeira de faladoiros. Tras realizar unha exposición detallada dos distintos proxectos que levou e leva adiante, coma o Estarreja, Fazunchar ou o Lata 65, tomou a palabra a graffiteira  Vegan Bunnies, quen achegou a súa perspectiva a pé de rúa, como artista acostumada a sortear os perigos derivados de transgredir, deliberadamente, os límites impostos pola lei nun espazo público rexido polo patriarcado. 

Finalmente, conformouse unha interesante conversa a varias bandas e coa activa participación do público na que, Natalia Andreoli e Lina Castellanos, de Dúo Amazonas; Lorena Cosba e as galegas Lupita Hard e Iria Fafián expuxeron as súas experiencias arredor dos condicionantes, case sempre traducidos en obstáculos, que impón o xénero á hora de traballar na rúa. 

Entre o público, conformado por unhas 30 persoas que completaron o aforo dispoñible na Casa Xohana Torres, había tanto profesionais do sector, coma representantes de administracións públicas e outras persoas interesadas na disciplina. De forma maioritaria, as presentes trasladaron os seus parabéns polo enfoque e temáticas abordadas, acentuando a necesidade de que foros como o organizado tivesen lugar.